ਨਵੀਂ ਦਿੱਲੀ , 4 ਸਤੰਬਰ
Puja Khedker Case: ਦਿੱਲੀ ਪੁਲੀਸ ਨੇ ਇਕ ਤਾਜ਼ਾ ਸਥਿਤੀ ਰਿਪੋਰਟ ਰਾਹੀਂ ਦਿੱਲੀ ਹਾਈ ਕੋਰਟ ਨੂੰ ਸੂਚਿਤ ਕੀਤਾ ਹੈ ਕਿ ਮੁਅੱਤਲ ਅੰਡਰਟਰੇਨੀ ਆਈਏਐਸ ਪੂਜਾ ਖੇਡਕਰ ਨੇ ਦੋ ਅਪੰਗਤਾ ਸਰਟੀਫਿਕੇਟ ਜਮ੍ਹਾ ਕਰਵਾਏ, ਉਹਨਾਂ ਵਿੱਚੋਂ ਇੱਕ ਜਾਅਲੀ ਹੋ ਸਕਦਾ ਹੈ। ਜਾਂਚ ਦੌਰਾਨ ਯੂਪੀਐੱਸਸੀ ਵੱਲੋਂ ਪ੍ਰਦਾਨ ਕੀਤੇ ਗਏ ਦਸਤਾਵੇਜ਼ਾਂ ਦੀ ਜਾਂਚ ’ਚ ਇਹ ਖੁਲਾਸਾ ਹੋਇਆ ਕਿ ਕਥਿਤ ਬਿਨੈਕਾਰ ਪੂਜਾ ਖੇਡਕਰ ਨੇ ਮੈਡੀਕਲ ਅਥਾਰਟੀ ਅਹਿਮਦਨਗਰ ਮਹਾਰਾਸ਼ਟਰ ਵੱਲੋਂ ਜਾਰੀ ਕੀਤੇ ਜਾਣ ਵਾਲੇ ਦੋ ਅਪੰਗਤਾ ਸਰਟੀਫਿਕੇਟ (ਮਲਟੀਪਲ ਡਿਸਏਬਿਲਟੀ) ਜਮ੍ਹਾ ਕੀਤੇ ਹਨ।
ਉਕਤ ਅਪੰਗਤਾ ਸਰਟੀਫਿਕੇਟ ਬਿਨੈਕਾਰ ਦੁਆਰਾ ਕ੍ਰਮਵਾਰ ਸਿਵਲ ਸੇਵਾਵਾਂ ਪ੍ਰੀਖਿਆਵਾਂ- 2022 ਅਤੇ 2023 ਦੌਰਾਨ ਜਮ੍ਹਾ ਕੀਤੇ ਗਏ ਸਨ। ਉਧਰ ਮੈਡੀਕਲ ਅਥਾਰਟੀ ਅਹਿਮਦਨਗਰ ਮਹਾਰਾਸ਼ਟਰ ਨੇ ਰਿਪੋਰਟ ਦਿੱਤੀ ਕਿ ਅਪੰਗਤਾ ਸਰਟੀਫਿਕੇਟ (ਮਲਟੀਪਲ ਡਿਸਏਬਿਲਟੀ) ਨੰਬਰ MH2610119900342407 ਸਾਡੇ ਸਿਵਲ ਸਰਜਨ ਦਫ਼ਤਰ ਦੇ ਰਿਕਾਰਡ ਅਨੁਸਾਰ ਜਾਰੀ ਨਹੀਂ ਕੀਤਾ ਗਿਆ ਹੈ, ਇਸ ਲਈ ਸਰਟੀਫਿਕੇਟ ਦੇ ਜਾਅਲੀ ਅਤੇ ਮਨਘੜਤ ਹੋਣ ਦੀ ਸੰਭਾਵਨਾ ਵਧੇਰੇ ਹੈ।
ਜ਼ਿਰਯੋਗ ਹੈ ਕਿ ਪਿਛਲੀ ਸੁਣਵਾਈ ਦੀ ਤਰੀਕ ’ਤੇ ਦਿੱਲੀ ਹਾਈ ਕੋਰਟ ਨੇ ਮੁਅੱਤਲ ਆਈਏਐਸ ਅਧਿਕਾਰੀ ਪੂਜਾ ਖੇਡਕਰ ਨੂੰ ਗ੍ਰਿਫ਼ਤਾਰੀ ਤੋਂ ਅੰਤਰਿਮ ਰਾਹਤ ਵਧਾ ਦਿੱਤੀ ਸੀ। ਹਾਈਕੋਰਟ ਨੇ ਪੁਲਿਸ ਨੂੰ ਨਿਰਦੇਸ਼ ਦਿੱਤਾ ਹੈ ਕਿ ਅਗਲੇਰੀ ਕਾਰਵਾਈ ਤੱਕ ਖੇਡਕਰ ਨੂੰ ਸ਼ੁੱਕਰਵਾਰ ਤੱਕ ਗ੍ਰਿਫ਼ਤਾਰ ਨਾ ਕੀਤਾ ਜਾਵੇ। ਯੂਪੀਐਸਸੀ ਨੇ ਪਹਿਲਾਂ ਦਲੀਲ ਦਿੱਤੀ ਸੀ ਕਿ ਪੂਜਾ ਖੇਡਕਰ ਇੱਕ “ਮਾਸਟਰਮਾਈਂਡ” ਹੈ ਅਤੇ ਉਸ ਦੀਆਂ ਕਾਰਵਾਈਆਂ ਦੂਜਿਆਂ ਦੀ ਸਹਾਇਤਾ ਤੋਂ ਬਿਨਾਂ ਸੰਭਵ ਨਹੀਂ ਸਨ। -ੲੈਐੱਨਆਈ
